Anwar Sadeed
har samt samundar hai har samt ravan paani
chhagal hai miri ḳhali socho hai kahan paani
barish na agar karti dariya men ravan paani
bazar men bikne ko aa jaata giran paani
ḳhud-rau hai agar chashma aa.ega miri janib
main bhi vahin baiTha huun marta hai jahan paani
kal shaam parindon ko uḌte hue yuun dekha
be-ab samundar men jaise ho ravan paani
jis khet se dahqan ko mil jaati thi kuchh rozi
us khet pe dekha hai hakim hai ravan paani
chashme ki tarah phuTa aur aap hi bah nikla
rakhta bhala main kab tak ankhon men nihan paani
bah jaati hai saath us ke shahron ki ghalazat bhi
jarub-kash-e-alam lagta hai ravan paani
bas ek hi rele men Duube the makan saare
‘anvar’ ka vahin ghar tha bahta tha jahan paani
Leave a Reply