hansi ki aankh men phaila nami ka rang dekha hai
andheron men lipaTta raushni ka rang dekha hai
sada pahlu men bhi madd-e-muqabil ki tarah rahna
kisi ki dosti men dushmani ka rang dekha hai
baḌi gahri mohabbat ki dhanak hai jin nigahon men
unhi men gaahe gaahe dil-lagi ka rang dekha hai
kitabon se nikalta hai to pahchana nahin jaata
vagarna samne aksar ḳhushi ka rang dekha hai
chura kar le na jaa.e faslon ki dhuup bhi jis ko
kisi par is qadar gahra kisi ka rang dekha hai
ye dekha hai ki gumrahi nishan banti hai manzil ka
taghaful ki Dagar men agahi ka rang dekha hai
shikasta soḳhta-jan bhi tamanna-e-baharan bhi
daraḳhton par ḳhizan men aadmi ka rang dekha hai
lage jo dhuup uḌ jaa.e mile barish to bah jaa.e
sabhi rangon se kachcha zindagi ka rang dekha hai
na jaane us pe utrega kabhi Thahrav ka mausam
har ik lahza badalta oḌhni ka rang dekha hai
Leave a Reply