uThaya hi nahin jaata jo bar-e-zindagi ham se
kinara kar chuki shayad kisi ki yaad bhi ham se
kabhi manus thi kitni bahar-e-zindagi ham se
magar daman-kashan hai aj-kal har ik ḳhushi ham se
shab-e-gham is tarah bhi kaT ga.i hai barha apni
kisi ki yaad pahron guftugu karti rahi ham se
kisi ke vaste tark-e-ta.alluq mashghala Thahra
hamare dil pe jo guzri hai vo puchhe koi ham se
kisi ko shad-kami hai kisi ko na-muradi hai
milenge rah-e-ulfat men koi tum se koi ham se
tiri chashm-e-karam ki vo tavajjoh hi nahin varna
kahan thi is qadar barham hamari zindagi ham se
basa-auqat ham ne mai-kade ke dar pe dastak di
tabi.at jab kisi surat na bahla.i ga.i ham se
kahan tak ḳhud-farebi men rahen ham mubtala ‘asi’
labon pe laa.i ja sakti nahin jhuTi hansi ham se
Leave a Reply