fughan-o-ah se paida kiya dard-e-judai ko
ghazab men jaan ko daala jata kar ashnai ko
mitaya pas-e-rusvai se meri ashnai ko
bichhaun aap ki ismat ko odhun parsai ko
na aaya baad-e-murdan bhi lahad par fatiha padhne
main itna bhi na samjha tha tiri na-ashnai ko
na dil apna hua apna na ik but par hua qaabu
karenge yaad kiya ham ai khuda tere khudai ko
kisi mahfil men jis dam zikr-e-sham-e-tur hota hai
dikha dete hain vo jal kar sar-angusht-e-hinai ko
faqir-e-be-nava us ke dar-e-daulat ka hai banda
ghanimat jante hain shaah tak jis ki gadai ko
asar paida karegi aah apni yaar ke dil men
nishane tak khuda pahunchaega tir-e-havai ko
kabhi hai fikr duniya ki kabhi uqba ka dhadka hai
utarun jama-e-tan se main kyunkar is dulai ko
gareban haath aata hai na sahra tak pahunchta huun
khuda ke vaste dekho mire be-dast-o-pai ko
falak vo tafraqa-parvaz-e-alam hai dila sar par
ghanimat janta huun gor tak apni rasai ko
shikasta-dil hain har dam har ghadi hain jaan ke laale
karun kya nosh-daro ko main kya luun musiyai ko
tamanna-e-dili ne ‘muntahi’ khoya mashikhat ko
milaya khaak men dast-e-havas ne mirzai ko