hai aarzu ki apna sarapa dikha.i de
a.ina dekhta huun ki chehra dikha.i de
masruf is qadar the ki savan guzar gaya
hasrat rahi ki abr barasta dikha.i de
ḳhamosh huun ki bolna tohmat hai is jagah
jab dekhna nahin hai to phir kya dikha.i de
socha tha bas ki zehn men tasvir ban ga.i
ab aankh kah rahi hai ki chehra dikha.i de
ab dhuul ki baja.e dhuan hai fazaon men
ḳhilqat pukarti hai ki sahra dikha.i de
chehron ka rang zard hua dhuup ki tarah
‘shahid’ kahin to abr ka TukḌa dikha.i de
Leave a Reply