nahin chamke ye hansne men tumhare daant anjum se
nikal aa.i taḌap kar barq aghosh-e-tabassum se
karo tum mujh se baten aur main baten karun tum se
kalim-ullah ho ja.un main ejaz-e-takallum se
sada-e-lan-tarani aati hai un ke takallum se
gira den tur-e-dil par sa.iqa barq-e-tabassum se
falak ko vajd hoga ai pari tere tabassum se
utar aa.egi zohra raqs karti bazm-e-anjum se
ye shauq-e-mai-kashi majnun bana kar mujh ko laaya hai
nikal aa.e kahin laila-e-mai bhi mahmil-e-ḳham se
kiya danton ko rangin vaah rahi baton ki rangini
lagi ab-e-guhar men aag lo barq-e-tabassum se
samand-e-naz ki Tapon se sar Takra.en sab ashiq
pila sharbat shahadat ka kisi din kasa-e-sam se
jo vo mehr-e-sip.har-e-husn nache apni mahfil men
to zohra mash.al-e-mah le ke aa.e bazm-e-anjum se
usi din phuul hain jis din vo gul turbat pe aa baiThe
sivum se kuchh gharaz mujh ko na kuchh matlab hai panjum se
jo uljhe mohtasib maiḳhane men ham jaa.en masjid ko
ḳhuda ke ghar chalen sar phoḌ kar ḳhisht-e-sar-e-ḳhum se
firaq-e-yar men meri tarah se ye bhi ro.e hain
savad-e-shab nahin kajal baha hai chashm-e-anjum se
hua main rind-mashrab ḳhaak mar kar is tamanna men
namaz aḳhir paḌenge vo kisi din to tayammum se
vahi chitvan vahi tevar miri ankhon men phirte hain
ghazab men paḌ gaya dekha abas tum ne tarahhum se
kahan tak eḌiyan ragḌen gala kaaTo gala kaaTo
uThao tum na ḳhanjar baaz aaya is tarahhum se
jo va.ada karte ho to sadma-e-furqat na dikhlana
masiha hote ho mash.hur ji uThta huun main tum se
mudallal jo suḳhan apna hai vo burhan-e-qate.a hai
tabi.at men ravani hai ziyada haft-qulzum se
mare hain ishq men ik gul ke kyuun qur.an mangate ho
paḌhi jaa.e gulistan men sivum men bab-e-panjum se
jo pahunche ta-falak shohra tumhari ḳhud-faroshi ka
ḳharidari ko aa.e mushtari bazar-e-anjum se
evaz chune ke gaara laa.e mai ka chahiye saaqi
hamari qabr agar pakki ho to ḳhisht-e-sar-e-ḳhum se
hamesha ḳhaak chhanvaoge misl-e-qais sahra ki
‘qalaq’ ko ye na thi ummid ai laila-manash tum se
Leave a Reply