Khursheed Akbar
asbab kahan jan-e-jahan dekhte rahna
ḳhali koi dam hai ye makan dekhte rahna
ta-umr tire shahr men rahna bhi nahin hai
milti hai kahan ja-e-aman dekhte rahna
palkon pe koi hai lab-e-iz.har ki surat
rakhta huun main ḳhanjar pe zaban dekhte rahna
aansu mire bachchon ki tarah ḳhuun se khelen
kuchh khel nahin ghar ka ziyan dekhte rahna
ik arsa-e-jan tak hi ye manzar nahin mauquf
phir qissa-e-alam hai dhuan dekhte rahna
bauchhar hai tiron ki vo rahvar akela
kitna hai shitabi ye saman dekhte rahna
duniya kisi maqtal men hai zindon ki gavahi
jaate hain kahan piir o javan dekhte rahna
hogi kisi manjdhar ke siine pe miri naav
dariya hai mire saath ravan dekhte rahna
tarik ufuq par vo ajab shaan se nikla
‘ḳhurshid’ se raushan hai jahan dekhte rahna
Leave a Reply