chashm-e-zahir se ruḳh-e-yar ka parda dekha
ankhen jab phuuT ga.iin tab ye tamasha dekha
dekhna ye hai ki ham ne tumhen kaisa chaha
puchhna ye hai ki tum ne hamen kaisa dekha
phir jalao.ge kabhi talib-e-didar ka ḳhat
saikḌon ankhon se us ne tumhen dekha dekha
kaan vo kaan hai jis ne tiri avaz suni
aankh vo aankh hai jis ne tira jalva dekha
aap kahte hain ki ja dekh liya dil tera
kahiye to apne siva dil men mire kya dekha
tum ḳhabar bhi na hue ḳhana-ba-doshon se kabhi
ham ne ghar phunk diya sab ne tamasha dekha
jin se hon soḳhta-janon ke kaleje ThanDe
unhin jalvon se ‘hasan’ tuur ko jalta dekha
Leave a Reply