isi surat se taskin-e-dil-e-nashad karte hain
abhi tak yaad aate ho abhi tak yaad karte hain
tabahi par hamari shikva-e-sayyad karte hain
chaman men hain kuchh aise bhi jo ham ko yaad karte hain
mohabbat naam hai us ka ta.alluq naam hai us ka
na ham azad hote hain na vo azad karte hain
vafa ka naam jab uTh ja.ega bedard duniya se
vo ro.enge bahut ham ko jo ab barbad karte hain
zamane se nirala hai karam sayyad-o-gulchin ka
jala kar ashiyan kahte hain ab azad karte hain
qafas hi ab nasheman hai qafas hi sahn-e-gulshan hai
asiron se kaho kyuun minnat-e-sayyad karte hain
samajh rakkha hai bazicha unhon ne dil ki duniya ko
kabhi abad karte hain kabhi barbad karte hain
kabhi apna samajh kar jin ko siine se lagaya tha
ajab aalam hai ‘arif’ vo hamen barbad karte hain
Leave a Reply