Manzar Shahab
vo gham-gusar bil-aḳhir bala-e-jan nikla
jise zamin samajhte the asman nikla
azim-tar hai mohabbat men ruuh ka rishta
magar badan ka ta.alluq bhi darmiyan nikla
suragh-e-qatl shahadat subut sab gunge
lahu ḳhamosh tha ḳhanjar bhi be-zaban nikla
tamam raste maazi ke band the phir bhi
har ek moḌ se yadon ka karvan nikla
suni jo meri kahani to ro paḌe sab log
sabhon ke dard men ik rishta-e-nihan nikla
ham apne gham ka fasana kaha kiye shab-bhar
hui jo sub.h to zikr-e-gham-e-jahan nikla
‘shahab’ jis ki ḳhitabat ka shor hai yaaro
ghazal ki bazm men kam-saut-o-kam-bayan nikla
Leave a Reply