kar gaya mere dil-o-jan ko mo.attar koi
chhu ke is tarah se guzra mujhe aksar koi
jitni nazren thiin usi shaḳhs men uljhi hui thiin
ja raha tha sar-e-bazar sambhal kar koi
kaun sa hadisa guzra nahin us par is baar
aur vo hai ki shikayat nahin lab par koi
dil ko dil un ki nigahon ne banaya varna
aisa be-dard tha dil jaise ki patthar koi
chand taron pe nazar Thahre to yuun lagta hai
tere jaisa hai pas-e-parda-e-manzar koi
vaqt Thahra hua lagta tha sar-e-rahguzar
is tarah dekh raha tha mujhe muḌ kar koi
husn shirin men bhi tha husn to azra men bhi tha
na hua mere trahdar ka ham-sar koi
aa.ina apne muqaddar pe na kyuun naaz kare
muḌ ke ik baar use dekhe jo sanvar kar koi
kitne tufan chhupe hain tah-e-har-mauj ‘bashir’
aaj ka daur hai ya jaise samundar koi
Leave a Reply