chashm-e-bina! tire bazar ka me.aar hain ham
dekh TuuTe hue ḳhvabon ke ḳharidar hain ham
kaise tariḳh faramosh karegi ham ko
tegh par ḳhuun se likkha hua inkar hain ham
tum jo kahte ho ki baaqi na rahe ahl-e-dil
zaḳhm bechoge chalo becho ḳharidar hain ham
yunhi lahron se kabhi khelne lag jaate hain
ek gharqab hui naav ki patvar hain ham
vo bhi ḳhush hai ki andhere men paḌe rahte hain
ham bhi ḳhush hain ki ujale ke taraf-dar hain ham
inkisari ne ajab shaan ata ki ham ko
is qadar ḳham hue lagne laga talvar hain ham
ek muddat se ye manzar nahin badla ‘tariq’
vaqt us paar hai Thahra hua is paar hain ham
Leave a Reply