Chashm-E-Bina! Tere Bazar Ka Mear Hain Hum

chashm-e-bīnā! tire bāzār kā me.aar haiñ ham

dekh TuuTe hue ḳhvāboñ ke ḳharīdār haiñ ham

kaise tārīḳh farāmosh karegī ham ko

teġh par ḳhuun se likkhā huā inkār haiñ ham

tum jo kahte ho ki baaqī na rahe ahl-e-dil

zaḳhm bechoge chalo becho ḳharīdār haiñ ham

yūñhī lahroñ se kabhī khelne lag jaate haiñ

ek ġharqāb huī naav kī patvār haiñ ham

vo bhī ḳhush hai ki añdhere meñ paḌe rahte haiñ

ham bhī ḳhush haiñ ki ujāle ke taraf-dār haiñ ham

inkisārī ne ajab shaan atā kī ham ko

is qadar ḳham hue lagne lagā talvār haiñ ham

ek muddat se ye manzar nahīñ badlā ‘tāriq’

vaqt us paar hai Thahrā huā is paar haiñ ham

Leave a Comment