Farogh Zaidi
mere chehre men koi aur hi chehra dekhe
vaqt mathe ki lakiron men vo Thahra dekhe
sab ko deti hai alag rang ye tasvir-e-hayat
sabz gulshan to koi dhuul ka sahra dekhe
us ke hathon men jo rahti hai vo ta.abir rahe
kyuun magar de ke mire ḳhvab pe pahra dekhe
us ko ehsas ki nayab guhar milte hain
Duub kar bahr-e-taḳhayyul men jo gahra dekhe
naam likkha hai anokha sa kahin ek ‘farogh’
dil mohabbat ka har ik baab sunahra dekhe
Leave a Reply