akhtar-hashmi

Zindagi Se Pas Lekin Husn Ke Qisse Se dur

zindagi se paas lekin husn ke qisse se duur

ham ghazal rakhte hain apni zulf ke saae se duur

ham se jin ko unsiyat hai vo khinche aa jaenge

un ko kya nazdik laaen jo hain ḳhud pahle se duur

jaane kaise karb ubhre mere chehre par ki jo

vo nigahen apni rakhte hain mire chehre se duur

ek lamha pyaar ka jis ko mile vo surḳh-ru

kyuun mujhe rakkha gaya phir ik isi lamhe se duur

zabt karna kitna mushkil tha mujhe ma.alum hai

zindagi ko phir bhi rakkha main ne har fitne se duur

zulm kar ke tu adalat se agar bach bhi gaya

soch bhagega kahan tak asman vaale se duur

aḳhirash ashkon ke chalte hi dua puuri hui

tum ne aḳhtar jin ko rakkha aaj tak apne se duur

More Poems

Leave a Comment