Zard Patton Pe Mera Nam Likha Hai Usne

zard pattoñ pe mirā naam likhā hai us ne

sabz ḳhvāboñ kā ye anjām likhā hai us ne

koī miltā nahīñ jo paḌh ke sunā de mujh ko

barg-e-gul par koī paiġhām likhā hai us ne

sach hai tanhā.ī meñ insān sanak jaatā hai

roz-e-raushan ko siyah-fām likhā hai us ne

mehr-o-mah diip huā abr samundar ḳhushbū

kis kī taqdīr meñ ārām likhā hai us ne

sar uchhalte haiñ zabāñ kaTtī hai jis meñ ‘anjum’

mere zimme vahī ik kaam likhā hai us ne

Leave a Comment