Arshad Abdul Hamid
mujh ko taqdir ne yuun be-sar-o-asar kiya
ek darvaza dua ka tha so divar kiya
ḳhvab-e-a.inda tire lams ne sarshar kiya
ḳhushk badal the hamen tu ne guhar-bar kiya
dekhne ki thi nigahon men ana ki surat
us giraftar ne jab mujh ko giraftar kiya
muddaton ghaav kiye jis ke badan par ham ne
vaqt aaya to usi ḳhvab ko talvar kiya
meri chahat ne ajab rang dikhaya mujh ko
kashmakash se miri ankhon ko giran-bar kiya
ik masiha ko mira chashm-numa Thahraya
ek qatil ko mira a.ina-bardar kiya
kaaT kar phenk di sansar ki kuchen ham ne
sabr ko phuul kiya phuul ko talvar kiya
Leave a Reply