Azhar Hashmi
bas ranj ki hai dastan unvan hazaron
jiine ke liye mar ga.e insan hazaron
vo jis ne miri ruuh ko dard-ashna rakkha
hain mujh pe usi zaḳhm ke ehsan hazaron
jis ḳhaak se kahte ho vafa ham nahin karte
so.e hain usi ḳhaak men sultan hazaron
ik rasm-e-takabbur hai so is daur ke insan
jebon men liye phirte hain pahchan hazaron
lazim hai masafat men bhaTak jaana hamara
ham tanha musafir ke hain saman hazaron
ab hai faqat andesha-e-halat mayassar
ham dil men kabhi rakhte the arman hazaron
ye shahr-e-suḳhan hai yahan har moḌ pe ‘az.har’
hoshiyar bane baiThe hain nadan hazaron
Leave a Reply