jis ne tiri ankhon men shararat nahin dekhi
vo laakh kahe us ne mohabbat nahin dekhi
ik ruup mire ḳhvab men lahra sa gaya tha
phir dil men koi chiiz salamat nahin dekhi
a.ina tujhe dekh ke gulnar hua tha
shayad tiri ankhon ne vo rangat nahin dekhi
yuun naqsh hua aankh ki putli pe vo chehra
phir ham ne kisi aur ki surat nahin dekhi
ḳhairat kiya vo bhi jo maujud nahin tha
tu ne tahi-daston ki saḳhavat nahin dekhi
sad-shukr guzari hai qayamat tan-e-tanha
us raat kisi ne miri halat nahin dekhi
kya tujh se kahen kaise kaTi kaise kaTegi
achchha hai ki tu ne ye musibat nahin dekhi
shayad isi baa.is vo firozan hai abhi tak
suraj ne kabhi raat ki zulmat nahin dekhi
sab ki tarah tu ne bhi mire aib nikale
tu ne bhi ḳhudaya miri niyyat nahin dekhi
tinka huun magar sail ke raste men khaḌa huun
ai bhagne vaalo miri himmat nahin dekhi
jo Thaan liya dil men vo kar guzra huun ‘shahzad’
aa.i hui sar par koi aafat nahin dekhi
Leave a Reply