khuun men duubi hui shairi
gham se vabasta ik naghmagi
sard hoti hui zindagi zindagi
jaan ghulati hui agahi
ek bujhte hue khvab ki raushni
khubsurat dukanon ke arasta shelf men
la ke akhir saja di gai
yaani bikne bikne ki shai hi bana di gai
likhne vaale ka ehsas apni jagah
par tijarat ke apne taqaze bhi hain
zehn ka ghunt ho ya ki tiryaq ho
nirkh-e-bazar ki nisbaton se sabhi
ik sajavat banavat ke paband hain
dekhiye roz-o-shab kis qadar shauq se
dard ki samt badhte hain gahak ke haath
zakhm bikte hain kitne saliqe ke saath
Leave a Reply