koi dil-lagi dil lagana nahin hai
qayamat hai ye dil ka aana nahin hai
mana.en unhen vasl men kis tarah ham
ye ruThe ka koi manana nahin hai
hai manzur unhen imtihan shauq-e-dil ka
nazakat ka ḳhali bahana nahin hai
vafa par dagha sulh men dushmani hai
bhala.i ka hargiz zamana nahin hai
shab-e-gham bhi ho ja.egi ik din aḳhir
kabhi ik ravish par zamana nahin hai
hai ku-e-butan bas ghar us ka hi ‘kaifi’
zamane men jis ko Thikana nahin hai
Leave a Reply