khvab jaisi hi koi apni kahani hoti
yuun to barbad na ye apni javani hoti
tere aane se chahak uthta ye virana-e-dil
phir se abad vahi ravish purani hoti
rabta rakha na diya ja-e-sukunat ka pata
is tarah bhi hai koi naql-e-makani hoti
ab mire paas nahin koi bhi rone ka javaz
hijr mausam ki sahi ashk fishani hoti
yaad karne ka tujhe koi bahana bhi nahin
koi chhalla koi chaudi hi nishani hoti
ab tire hijr se manus tabiat hai miri
pahle vaali si nahin jaan pe girani hoti
nakhl-e-jan pe jo barasta tera badal ‘mariyam’
kuchh to kam badan ki ye tishna-dahani hoti
Leave a Reply