phir bhiig chalin ankhen chalne lagi purva.i
har zaḳhm hua taaza har choT ubhar aa.i
phir yaad koi aaya phir ashk umaD aa.e
phir ishq ne siine men ik aag si bhaḌka.i
barbad-e-mohabbat ka aalam hi ajab dekha
sau baar lahu roya sau baar hansi aa.i
rahta hai ḳhayalon men phirta hai nigahon men
ik shahid-e-rangin ka vo alam-e-ra.ana.i
kis rang se gulshan men vo jan-e-bahar aaya
anchal ki hava aa.i zulfon ki ghaTa chha.i
phir sehn-e-gulistan men ik mauj hui raqsan
phir meri nigahon men zanjir si lahra.i
ai husn tire dar ki azmat hai nigahon men
kab ishq ko aate the adab-e-jabin-sa.i
kya kya dil-e-muztar ke arman machalte hain
tasvir-e-qayamat hai zalim tiri angḌa.i
ik ruh-e-tarannum ne ik jan-e-taghazzul ne
phir aaj na.i dhun men ‘muztar’ ki ghazal gaa.i
Leave a Reply