His Nahin Tadap Nahin Bab-E-Ata Bhi Kyun Khule

his nahin tadap nahin bab-e-ata bhi kyuun khule

ham hain girafta-dil abhi ham se saba bhi kyuun khule

ab ye udaas din hamen saath liye liye phire

ḳhvab bujhe to kya raha kaali ghata bhi kyuun khule

dil ka koi ziyan nahin jaan ka moamla nahin

haath men ik diya nahin mauj-e-hava bhi kyuun khule

yaan kisi rahguzar pe kuchh naqsh-e-qadam pade rahe

qasid-e-ḳhush-ḳhabar nahin shahr-e-saba bhi kyuun khule

umr tamam kaat di hasrat-e-kaḳh-o-ku liye

mere tumhare samne arz-o-sama bhi kyuun khule

kuza-ba-kuza bat gaiin jitni bhi thiin sadaqaten

ḳhali hatheliyon pe ab harf-e-dua bhi kyuun khule

shiddat-e-raqs-e-arzu apna javaz aap thi

meri nigah par ‘ada’ meri ḳhata bhi kyuun khule

Leave a Comment