Arz-O-Sama Fareb Na Ye Bahr-O-Bar Fareb

arz-o-sama fareb na ye bahr-o-bar fareb

hai asl men ye saara fareb-e-nazar fareb

pahle se ham gazida-e-ahbab hain bahut

is par ye mustazad ho tu bhi agar fareb

kis kis ko ro.en kucha-e-be-e’tibar men

chara fareb hai to kabhi charagar fareb

bandha tha jo bhi ghar se vo zambil men nahin

aḳhir ko de gaya hamen zad-e-safar fareb

baten hamari aur to sab Thiik hain magar

hain un ke darmiyan ye agar aur magar fareb

hote hain aadmi se ye manus bhi bahut

dete hain ek din yahi divar-o-dar fareb

kya kuchh nahin fareb jahan-e-fareb men

ye mera ijz aur tira karr-o-far fareb

‘nami’ ye sab fareb fareb-e-fareb hai

‘nami’ idhar fareb hai ‘nami’ udhar fareb