Badan Ye Jis Ke Liye Sham Jaisa Saya Hai

badan ye jis ke liye shaam jaisā saayā hai

vo shaḳhs aaj bhī mere liye parāyā hai

fazā meñ aaj parindoñ kī chahchahāhaT hai

ajab sā shor daraḳhtoñ ne bhī machāyā hai

guzashta daur kī lailā se muḳhtalif huuñ maiñ

ki maiñ ne ishq kamāyā hai ghar basāyā hai

ye merā ḳhākī badan le rahā hai ukhḌī saañs

so maiñ ne bhejā hai qāsid use bulāyā hai

rahegā vo to mire ḳhvāboñ kī hifāzat meñ

charāġh-e-āḳhirī jo niiñd meñ jalāyā hai

Leave a Comment