kisi ke dukh pe agar ham malal karte hain
ajiib log hain ulTa saval karte hain
kabhi kabhi to use phunkne ko ji chahe
vo ghar ki jis ki bahut dekh bhaal karte hain
tumhare saath nahin mas.ala ye shukr karo
jo tum ko dekh ke sansen bahal karte hain
tumhen bikharte hue phuul achchhe lagte the
so apni zaat ko ham pa.emal karte hain
bhala ho shahr-e-sitamgar tire makinon ka
ye marne valon ka kitna ḳhayal karte hain
tumhara hijr ghanimat hai aise mausam men
tumhare vasl ke lamhe niDhal karte hain
vo jin ko Thiik se aata nahin hai kaam koi
kamal hai ki vo ‘sahir’ kamal karte hain
Leave a Reply