Koi Tara Kahin Mahtab Se Milta-Julta

koī taarā kahīñ mahtāb se miltā-jultā

yahī manzar hai mire ḳhvāb se miltā-jultā

ghar muzayyan hai to phir sahn bhī ḳhālī kyuuñ ho

kyuuñ nahīñ apne meñ ahbāb se miltā-jultā

rau maiñ bahtā huuñ to hotī hai ragoñ meñ halchal

jaane kyā mujh meñ hai sailāb se miltā-jultā

qatra-e-surḳh meñ jab ḳhuun kī tāsīr nahīñ

kyā hai phir jism meñ tezāb se miltā-jultā

āsmāñ mujh se chhupātā hai koī sachchā.ī

yā koī vahm hai is ḳhvāb se miltā-jultā

kis haqīqat ko chhupātī haiñ nigāheñ ‘rāhat’

ret hai yā ki sarāb aab se miltā-jultā

Leave a Comment