ye nim-baz tiri ankhḌiyon ke maiḳhane
nazar mile to chhalak jaa.en dil ke paimane
sharab-e-shauq se bojhal labon ke paimane
tiri nigah ko aise men kaun pahchane
kahin kali ne tabassum ka raaz samjha hai
jo ḳhud chaman hai vo apni bahar kya jaane
jo hosh men tha to koi na mai-ba-jam aaya
bahak gaya huun to duniya chali hai samjhane
ajab nahin jo mohabbat mujhe samajh na sake
vo ajnabi huun jise ziist bhi na pahchane
yahin sujud-e-mohabbat ki bastiyan thiin kabhi
bata rahe hain ye dair-o-haram ke virane
kahin charagh jalane ki ho rahi hai sabil
bujha rahe hain yahan sham.a ḳhud hi parvane
fareb-e-mashriq-o-maghrib hain rahravan-e-jadid
ye bad-nasib na aaqil hue na divane
vo zinda hai jo bahe mauj-e-vaqt ki rau men
vo zinda-tar hai jo tufan men Thairna jaane
main apni bazm se itna hi duur huun ki ‘nushur’
miri navaon se kuchh ashna hain begane
Leave a Reply