Charagh-Ha-E-Takalluf Bujha Diye Gae Hain

charagh-ha-e-takalluf bujha diye ga.e hain

uThao jaam ki parde uTha diye ga.e hain

ab is ko diid kahen ya ise kahen didar

hamare aage se jo ham haTa diye ga.e hain

ab is maqam pe hai ye junun ki hosh nahin

miTa diye ga.e hain ya bana diye ga.e hain

ye raaz marne se pahle to khul nahin sakta

sula diye ga.e hain ya jaga diye ga.e hain

jo mil ga.e to tavangar na mil sake to gada

ham apni zaat ke andar chhupa diye ga.e hain

charagh-e-bazm hain ham raz-dar-e-sohbat-e-bazm

bujha diye ga.e hain ya jala diye ga.e hain