aaj gum-gashta ḳhayalat ne chaunkaya hai
phir koi dasht-e-junun se mujhe le aaya hai
zehn-e-avara ne ehsas ko rahen de kar
manzil-e-dar-o-rasan tak mujhe pahunchaya hai
ḳhauf ne luuT li har gaam pe nabzon ki asaas
dar-ba-dar ruuh ki galiyon men mira saaya hai
hausle aaj bhi miras hain mere dil ke
main ne har-gam pe tufan ko palTaya hai
be-ḳhatar kaun chala janib-e-manzil ‘manzar’
kis ka lahja hai jo mahaul se Takraya hai
Leave a Reply