nigah kya aur mizha kya ai sanam is ko bhi us ko bhi
samajhte hain qaza ka tiir ham is ko bhi us ko bhi
pade the dil ke pichhe us ko to gharat kiya tum ne
raha ab diin o iman lo sanam is ko bhi us ko bhi
agar le mol ik bose pe mera den o iman tu
main de dunga tire sar ki qasam is ko bhi us ko bhi
haqiqat men tafavut kuchh nahin shaikh o barahman men
suna hai ham ne bharte tera dam is ko bhi us ko bhi
gira deta hai ankhon se miri sumbul ho ya nagin
tumhari kakul-e-pechan ka kham is ko bhi us ko bhi
kabhi tevari chadhana aur kabhi munh pher kar hansna
tira ashiq samajhta hai sitam is ko bhi us ko bhi
hamari aabru kya aur dil par hausla kaisa
dubo dena ari o chashm-e-nam is ko bhi us ko bhi
kiya iqrar bosa dene ka diin galiyan tum ne
faqir-e-ishq huun samjha karam is ko bhi us ko bhi
khat-e-mahbub o pa-e-nama-bar qismat se haath aae
laga ankhon se ‘anjum’ dam-ba-dam is ko bhi us ko bhi
Leave a Reply