Nomaan Shauque
barson purane zaḳhm ko be-kar kar diya
ham ne tira javab bhi tayyar kar diya
tauq-e-badan utaar ke phenka zamin se duur
duniya ke saath chalne se inkar kar diya
ḳhud hi dikha.e ḳhvab bhi tausi-e-shahr ke
jangal ko ḳhud hi chiḳh ke hushiyar kar diya
jamhuriyat ke biich phansi aqaliyat tha dil
mauqa jise jidhar se mila vaar kar diya
aa.e the kuchh sitare tiri raushni ke saath
ham apne hi nashe men the inkar kar diya
vo niind thi ki maut mujhe kuchh pata nahin
gahre ghane sukut ne bedar kar diya
ham a.ine ke samne aa.e to ro paḌe
us ne saja-sanvar ke be-kar kar diya
Leave a Reply