kaisi kaisi thiin unhi galiyon men zeba suraten
yaad ik ik moḌ pe aati hain kya kya suraten
nim-shab hote hain va jis dam dariche yaad ke
kis ada se jhankti hain ab vo ra.ana suraten
suraten kuchh dekh kar aisa bhi aata tha ḳhayal
ḳhaak se aisi kahan hoti hain paida suraten
luuT kar pahle-pahal aa.e the jab us shahr se
ajnabi lagti thiin ankhon ko shanasa suraten
aaj tak vo dil ki divaron pe kanda hain ‘bashir’
phir nazar aa.en nahin jo mah-sima suraten
Leave a Reply