hava ke madd-e-muqabil raha kisi ke liye
main vo diya huun jo shab bhar jala kisi ke liye
hamare vaste koi dua kare na kare
hamare paas nahin bad-dua kisi ke liye
hava ke ḳhauf se mat baiTh ghup andhere men
jala.e ja tu diye par diya kisi ke liye
bacha ke sham.a-e-dil-o-jan main kis liye rakhta
main jal gaya sar-e-rah-e-vafa kisi ke liye
na jaane aap ka mizan-e-adl kaisa hai
kisi ko hukm-e-riha.i saza kisi ke liye
bahut bahane the bujhne ke vaste ‘kausar’
magar main ḳhud ko jalata raha kisi ke liye
Leave a Reply