naya mazmun kitab-e-zist ka huun
nihayat ghaur se socha gaya huun
sunen mujh ko to main dhaḌkan huun dil ki
nahin sunte to sahra ki sada huun
miri janib koi aa.e to puchhun
nishan-e-rah huun manzil huun kya huun
kisi ko kya bata.un kaun huun main
ki apni dastan bhula hua huun
ḳhud apni diid se andhi hain ankhen
ḳhud apni guunj se bahra hua huun
miri sairabiyon men tishnagi hai
ki main dariya huun lekin ret ka huun
vo ran mujh men paḌa hai ḳhair o shar ka
ki apni zaat men ik karbala huun
mira siina hai chhalni nai ki surat
inhin zaḳhmon se main naghma-sara huun
mujhe shabnam ka a.ina mila hai
isi men gul ki surat dekhta huun
miri maujudgi se bandagi hai
ki jab se gum hua huun main ḳhuda huun
Leave a Reply