Tujhse Shikwa Na Koi Ranj Hai Tanhai Ka

Mahtab Haider Naqvi

tujh se shikva na koi ranj hai tanha.i ka

tha mujhe shauq bahut anjuman-ara.i ka

kuchh to ashob-e-hava aur havas ki hai shikar

aur kuchh kaam baḌha hai miri bina.i ka

aa.i phir nafa-e-imroz se ḳhushbu-e-visal

khul gaya phir koi dar band pazira.i ka

main ne poshida bhi kar rakkha hai dar-parda-e-sher

aur bharam khul bhi gaya hai miri dana.i ka

yaani is baar bhi vo ḳhaak uḌi hai ki mujhe

ek khaTka sa laga rahta hai rusva.i ka

sha.iri kaam hai mera so main kahta huun ghazal

ye abas shauq nahin qafiya-paima.i ka