Thokaron Ki Shai Parastish Ki Nazar Tak Le Gae

Raunaq Raza

Thokaron ki shai parastish ki nazar tak le ga.e

ham tire kuche ke ik patthar ko ghar tak le ga.e

chhoḌ kar jaate rahe sab karvan vaale magar

raste hi ham-safar nikle jo ghar tak le ga.e

apne hi maqtul Thahre apne hi qatil bane

apne hi hathon se ham kashti bhanvar tak le ga.e

shaam hi tak tha sukut-e-qabl-e-tufan phir na puchh

kaise kaise ham charagh-e-shab sahar tak le ga.e

TuTta kab tak na aḳhir aise taa.ir ka ghurur

noch kar sayyad jis ke bal-o-par tak le ga.e