abbas-dana

Apne Hi Khun Se Is Tarah Adawat Mat Kar

apne hi khuun se is tarah adavat mat kar

zinda rahna hai to sanson se baghavat mat kar

siikh le pahle ujalon ki hifazat karna

shama bujh jaae to andhi se shikayat mat kar

sar ki bazar-e-siyasat men nahin hai qimat

sar pe jab taaj nahin hai to hukumat mat kar

khvab ho jaam ho taara ho ki mahbub ka dil

tutne vaali kisi shai se mohabbat mat kar

dekh phir dast-e-zarurat men na bik jaae zamir

zar ke badle men usulon ki tijarat mat kar

pursish-e-hal se ho jaenge phir zakhm hare

is se behtar hai yahi meri ayadat mat kar

sar jhukane ko hi sajda nahin kahte ‘dana’

jis men dil bhi na jhuke aisi ibadat mat kar

More Poems

Leave a Comment