Shikasta-Khwab-O-Shikasta-Pa Hun Mujhe duaon Mein Yaad Rakhna

Abbas Tabish

shikasta-khvab-o-shikasta-pa huun mujhe duaon men yaad rakhna

main akhiri jang lad raha huun mujhe duaon men yaad rakhna

havaen paigham de gai hain ki mujh ko dariya bula raha hai

main baat saari samajh gaya huun mujhe duaon men yaad rakhna

na jaane kuufe ko kya khabar ho na jaane kis dasht men basar ho

main phir madine se ja raha huun mujhe duaon men yaad rakhna

mujhe azizan-e-man mohabbat ka koi bhi tajraba nahin hai

main is safar men naya naya huun mujhe duaon men yaad rakhna

mujhe kis se bhalai ki ab koi tavaqqoa nahin hai ‘tabish’

main adatan sab se kah raha huun mujhe duaon men yaad rakhna