safar men koi rukavaT nahin gada ke liye
khula hua hai har ik rasta hava ke liye
ye puchhti hai har ik sub.h aa ke mauj-e-nasim
koi payam kisi yar-e-ashna ke liye
tavaf-e-dair-o-haram se to ho chuke farigh
chalo ziyarat-e-yaran-e-ba-safa ke liye
main kyuun na ba-sar-e-uryan phirun tah-e-aflak
ki faḳhr hai sar-e-uryan barahna-pa ke liye
ye shahr shahr-e-baḳhilan hai ai dil-e-bimar
yahan to zahr bhi milta nahin dava ke liye
shikar DhunDh ke laa.i kahan kahan kahan se hayat
darinda-e-ajal-o-azdar-e-qaza ke liye
ajiib baat ki manzil ka jab bhi qasd hua
baja.e paanv ke haath uTh ga.e dua ke liye
sitam-zarif zamane ne chun liya ham ko
girani-e-nafs-o-garmi-e-nava ke liye
siva.e kashti-e-langar gusista kya hogi
ghariq-e-bahr ki saughat na-ḳhuda ke liye
hamin men kyuun hadaf-e-tanz ai jamal-e-bahar
sabhi ne phuul chune the tiri qaba ke liye
na zad-e-rah na rahbar na mezban na sara.e
ham aise badiya-gardan-e-be-nava ke liye
jahan jahan bhi hue par-kusha ham ahl-e-zamin
zamin ke bojh hi sabit hue ḳhala ke liye
Leave a Reply