Sahil Pe Ruk Ke Su-E-Samundar Na Dekhiye

Azad Gulati

sahil pe ruk ke su-e-samundar na dekhiye

bahar se apne aap ka manzar na dekhiye

apne vajud hi pe na guzrin ka.i shokuk

saa.e ko apne qad ke barabar na dekhiye

jaage to mahz ret hi pa.enge har taraf

gar ho sake to ḳhvab men sagar na dekhiye

apne hi sar ke zaḳhm ka kuchh kijiye ilaaj

aaya hai kis taraf se ye patthar na dekhiye

yakja na karne aa.ega koi tamam umr

ḳhush-fahmiyon se ḳhud men bikhar kar na dekhiye

phir yuun na ho ki apna badan ajnabi lage

behtar hai is ke ḳhol se bahar na dekhiye

‘azad’ ji Dara.ega parchha.iyon ka ḳhauf

viran nazar se koi bhi manzar na dekhiye