Mahmood Shaam
muddaton ba.ad vo galiyan vo jharoke dekhe
jism ki raakh se uThte hue sho.ale dekhe
dil men dar aa.iin ga.i sa.aten ḳhushbu ban kar
sadiyon ki niind se phir jagte lamhe dekhe
rang barsati vahi sub.h vahi bhigti shaam
vahi ehsas men Duube hue saa.e dekhe
ek ik moḌ mile bichhḌe ḳhayalon ke hujum
suune darvazon men phir chand se chehre dekhe
ek ik aankh pe lamhon ka fusun taari hai
kaun us vaqt ki divar se aage dekhe
tah men baste hain chamakte hue rangon ke nagar
koi is ghor andhere men utar ke dekhe
‘sham’ jab toḌ liya us se tha jo bhi rishta
apne iz.har ke phir kitne hi raste dekhe
Leave a Reply