Muneer Saifi
jaa.ez hai us ka qatl hamare hisab se
jis ne mohabbaton ko nikala nisab se
tanqid kar rahe hain kitab-e-hayat par
aage na baḌh sake jo kabhi intisab se
main sahab-e-ḳhabar bhi nazar bhi junun bhi tha
jab tak raha tha mera ta.alluq kitab se
us vaqt ek sajda baḌe kaam aa gaya
main jab guzar raha tha ana ke azaab se
ik lamhe ka firaq hava.en na sah sakin
dariya ki sharmsar rahega habab se
mujh se baḌe baḌe the gunahgar us jagah
be-kar Dar raha tha main yaum-e-hisab se
kanTon ke ḳhauf se bhi larazte ho tum ‘munir’
aur ghar bhi chahte ho sajana gulab se
Leave a Reply