nazar aae kya mujh se faani ki surat
ki pinhan huun dard-e-nihani ki surat
bana huun vo main na-tavani ki surat
ghazab hi khichi be-nishani ki surat
khamoshi jo hai jqtiza-e-tabiat
to un ko mili be-dahani ki surat
nazar aae kya jalva-e-husn baaqi
ki parda hai duniya-e-fani ki surat
tum aur zikr-e-aghyar par chup rahoge
kahe deti hai be-dahani ki surat
hamare gale par to chalti dikhao
kahan tegh men hai ravani ki surat
qayam apna us kucha men pa-bigul hai
mile khaak men ham to paani ki surat
gudaz-e-dil-e-tishna ka maan ghazab hai
vo khanjar na bah jaae paani ki surat
barabar hai yahan bud-o-nabud apni
nishan hai mira be-nishani ki surat
araq-e-sharm se khaksari men huun main
hua khaak bhi main to paani ki surat
jo puchho to us chashm ka dekhna hai
vo hai gardish asmani ki surat
duboya mujhe aab men sharm se vo
khade hain mire sar pe paani ki surat
numud apni vaaqe men kuchh bhi nahin hai
yahan khvab hai zindagani ki surat
vo dil ru-numai men lete hain pahle
dikhate hain jab jan-sitani ki surat
mujhe kushta dekha to qatil ne puchha
yaqin hai yahan bad-gumani ki surat
pade mar ke mitne ko ham thokaron men
magar kat gai zindagani ki surat
zaban par hai qasid ki apni rasai
hua huun payam zabani ki surat
mujassam hi mauhum aane men un ke
nazar aati hai zindagani ki surat
tire vaade par ziist hai marg apni
bahut hi badhi na-tavani ki surat
vo is shakl se meri balin pe aae
ki ik aafat asmani ki surat
nazar ban ke phirti hai ankhon men apni
kisi alam-e-naujavani ki surat
na ho rashk to kijiye vahan madh-e-dushman
ki hai yaar ki raz-dani ki surat
mujhe dekho aur us ke vaade pe jiina
ye hai zinda-e-javedani ki surat
vahan bad-gumani ki tarif kya ho
yaqin ho jahan bad-gumani ki surat
nazar-soz vo rukh vo inkar behad
magar hain vo ik lan-tarani ki surat
dikhate hain vo rakh se yuun naaz pinhan
ki alfaz jaise maani ki surat
yahan kya samai dam-e-tegh qatil
ki nazron men hai sakht jaani ki surat
jo naqsh-e-fana hon to vo dil pe ‘anvar’
khinchi aur ik bad-gumani ki surat
Leave a Reply