Bharat Bhushan Pant
samundaron ko bhi dariya samajh rahe hain ham
ye apne-ap ko ab kya samajh rahe hain ham
hamari raah men haa.el jo ik andhera hai
use bhi apna hi saaya samajh rahe hain ham
yahin talak hai rasa.i hamari ankhon ki
ki ḳhadd-o-ḳhal ko chehra samajh rahe hain ham
hamari baat kisi ki samajh men kyuun aati
ḳhud apni baat ko kitna samajh rahe hain ham
ab apne dard ko sahna bahut hi mushkil hai
zara hai zaḳhm ko gahra samajh rahe hain ham
abhi fuzul hai manzil ki baat bhi karna
abhi to logon se rasta samajh rahe hain ham
bas ek raat Thaharne ka ye natija hai
sara-e-fani ko duniya samajh rahe hain ham
Leave a Reply