Shayar Jamali
har aan rah-e-shauq men chalne ki lagan hai
har gaam vahi silsila-e-dar-o-rasan hai
ahista guzar bad-e-saba us ki gali se
sunte hain ki us shoḳh ka phulon sa badan hai
us baagh ke ḳharon se bhara hai mira daman
jis baagh ke phulon men bhi ḳharon si chubhan hai
allah re har saans ki ghaTti hui qimat
is daur ke insan ka ji lena bhi fan hai
palkon pe hain TuuTe hue ḳhvabon ke janaze
aur ruuh pe ehsas ke zaḳhmon ki jalan hai
ghabra ke tumhin chiḳh paḌo sard chaTano
is dard ke sahra men to sadiyon ki ghuTan hai
zindan men asiron ka ajab haal hai ‘sha.ir’
bas vird-e-zaban sahn-e-chaman sahn-e-chaman hai
Leave a Reply