Mohammad Yusuf Rasikh
duniya men koi ranj se baḌh kar ḳhushi nahin
vo bhi hamen nasib kabhi hai kabhi nahin
dard-e-jigar ki tum pe musibat paḌi nahin
tum to kahoge ishq ki manzil kaḌi nahin
dushman ki raah rok ke baiTha huun aaj main
duniya ka rasta hai tumhari gali nahin
dushman ki maut ka tumhen kyunkar na ho malal
ik ba-vafa jahan men vahi tha vahi nahin
shoḳhi kisi ki khul ga.i aḳhir kalim par
karne ki thi jo baat vahi un se ki nahin
qatron ke lab pe shor-e-anal-bahr hai ravan
taqlid kya ye hazrat-e-mansur ki nahin
ifa-e-ahd hai ki qayamat ka shor hai
tum khul ke kah na do ki zaban ham ne di nahin
laila ne ḳhud qarar diya hai vafa ko jurm
majnun ne vo kitab-e-mohabbat paḌhi nahin
kaTne ko kaT rahi hai barabar shab-e-firaq
jiine ko ji raha huun magar zindagi nahin
tum ko fareb-e-ghair se agah kar diya
varna mujhe kisi se koi dushmani nahin
rota hai be-sabati-e-gulzar-e-dahr par
ghunche ke lab pe ghaur se dekho hansi nahin
ankhon ne phuuT phuuT ke sab haal kah diya
ain-e-visal men bhi yahan ḳhamushi nahin
pir-e-mughan ke faiz se raushan hai mai-kada
saghar ka jo murid nahin muttaqi nahin
aram se qafas men guzarunga zindagi
achchha hua ki taqat-e-parvaz hi nahin
aati hai ḳhak-e-tur se ab tak yahi ḳhuda
dil ki lagi ka zikr koi dil-lagi nahin
ashiq ke dam se husn ki duniya ko hai farogh
bulbul nahin to raunaq-e-gulzar hi nahin
dilbar ke intiḳhab men mujh se ḳhata hui
mera qusur hai ye ḳhata aap ki nahin
vahdat ka vo surur tha saaqi ke jaam men
piine ko ham ne pi hai magar be-ḳhudi nahin
puchha tha bevafa to na paaya raqib ko
main ne bhi kis maze se kaha hai ki ji nahin
khane ko zaḳhm milte hain piine ko ashk hain
rozi jahan hain kya miri taqdir ki nahin
ashiq ke zaḳhm dekh ke iisa ne kah diya
ye to nazar ki choT hai talvar ki nahin
tishna-labon ki jaan hai shamshir-e-ab-dar
ḳhvahish unhen to kausar-o-tasnim ki nahin
jumbish hui hai dashna-e-ghamza ko be-sabab
allah ḳhair alam-e-asbab ki nahin
jis samt aankh uThti hai kushton ka Dher hai
maqtal hai ashiqon ka tumhari gali nahin
jannat se kuchh gharaz hai na duniya se vasta
ma.ashuq apna huur nahin hai pari nahin
ḳhana-ḳharab-e-ishq ki halat na puchhiye
koi bhi gham-gusar ba-juz bekasi nahin
inkar ab to is lab-e-nazuk se ho chuka
pahli si shakl ghuncha-e-ummid ki nahin
tu ḳhana-zad-e-zulf ko azad kyuun kare
main to tira ghulam huun main aadmi nahin
huron ko bhej kar miri halat to puchhiye
kunj-e-mazar ba.is-e-dil-bastagi nahin
ik mah-ru ki yaad ne chamka diya hai dil
siina hai daagh daagh magar tirgi nahin
tasir aah ki kabhi tum ko dikha.enge
ham hain to gumbad-e-falak-e-chambari nahin
barish hi ko ulaT ke bana do na tum sharab
tum ko zara mazaq-e-adab-parvari nahin
rota hai koi dil ko koi apna jaan kar
Daaka hai luT-mar hai ye dilbari nahin
ankhon se qatl karte ho lab se jalate ho
phir ye kamal kya hai jo afsun-gari nahin
talib ki aankh karti hai ḳhira shua-e-husn
parda hai us ka naam ye be-pardagi nahin
zamzam haram se aata hai ‘rasiḳh’ ke vaste
vo ḳhana-e-ḳhuda hai vahan kuchh kami nahin
‘rasiḳh’ kise suna.en ham apna bayan-e-gham
‘ghalib’ nahin ‘anis’ nahin ‘anvari’ nahin
Leave a Reply