dasht-e-ehsas men avaz-e-dara milti hai
mujh ko har saans men tamhid-e-nava milti hai
raat so jaa.e to bedar hava milti hai
ghar ki dahliz pe qadmon ki sada milti hai
tujh ko shayad nahin malum harif-e-jada
ye saḌak dasht-e-bala-ḳhez se ja milti hai
ham jise bechna chahen vo ḳhariden kyon kar
zindagi ham se tu bazar men kya milti hai
chand paane ko musir ho koi rota bachcha
a.ina haath men de do to jaza milti hai
ghar ke shishon pe tira naam likha hai jab se
dhuup gul-dan ke phulon se ḳhafa milti hai
tujh ko sochen bhi nahin aur kahani ki tarah
baat kyon kucha-o-bazar se ja milti hai
Leave a Reply