Zeb Ghauri
jaag ke mere saath samundar raten karta hai
jab sab log chale jaa.en to baten karta hai
shaam ko der se pahunchun to lagta hai ḳhafa mujh se
mujh se bahut barham ho aisi ghaten karta hai
mere siva shayad us ka bhi koi dost nahin
meri apni jaane kya kya baten karta hai
dil gham se bojhal ho to dekho phir chheḌen us ki
chhinTe munh pe maar ke kya barsaten karta hai
aur bhi gahri ho jaati hai us ki sargoshi
mujh se kisi ki ankhon ki jab baten karta hai
mujh ko motiyon se kya lena ‘zeb’ samundar bhi
jaane kya mire ashkon ki saughaten karta hai
Leave a Reply