na Dhalti shaam na ThanDi sahar men rakkha hai
safar ka lutf kaḌi dopahar men rakkha hai
juda.iyon ke manazir hain ab bhi yadon men
bichhaḌte vaqt ka lamha nazar men rakkha hai
bacha bacha ke ghani chhanv ko tiri ḳhatir
tamam umr badan ke shajar men rakkha hai
tumhare naam ko likkha hai paikar-e-gul par
tumhari yaad ko ḳhushbu ke ghar men rakkha hai
kabhi sukun se jiine nahin diya us ne
vo ek ishq ka sauda jo sar men rakkha hai
phir ek baar luTana hai karvan dil ka
qadam ko phir se tiri rahguzar men rakkha hai
‘ḳhumar’ kis ne kiya phir se dar-ba-dar mujh ko
ye kis ne mujh ko musalsal safar men rakkha hai
Leave a Reply